18 лютага, Гомель / Кар. БЕЛТА /. Моладзь павінна з адказнасцю ставіцца да місіі быць будаўнікамі будучыні – у тым ліку і ўсёй дзяржавы. Такое меркаванне выказаў сёння ўдзельнік VI Усебеларускага народнага сходу, старшы выкладчык кафедры агульнай фізікі Гомельскага дзяржаўнага ўніверсітэта імя Ф. Скарыны Аляксей Зайцаў на арганізаванай у ВНУ дыялогавай пляцоўцы, прысвечанай вынікам ВНС, перадае карэспандэнт БЕЛТА.
“Моладзь – гэта будучыня. Нам будаваць краіну, сваю кар’еру, сваё жыццё. І трэба з адказнасцю ставіцца да місіі быць будаўнікамі будучыні – у тым ліку і ўсёй дзяржавы”, – адзначыў Аляксей Зайцаў.
На яго думку, студэнтам, школьнікам важна ўмець аналізаваць сітуацыю, знаходзіць праўду і прымаць правільныя рашэнні, якія не будуць супярэчыць канструктыўнаму будаўніцтву краіны.
“Кожны павінен усвядоміць асабістую адказнасць у агульнай справе і быць неабыякавым, небязуважным”, – сказаў старшы выкладчык. Ён таксама перакананы: будаваць будучыню трэба, захоўваючы дасягненні, не руйнуючы тое, што ўжо ёсць, удасканальваючы і развіваючы канкрэтнымі справамі, учынкамі сфармаваны за гады незалежнасці шлях.
У ліку дэлегатаў ад універсітэта на ўсенародным форуме была і трэцякурсніца эканамічнага факультэта Дар’я Казлова. На сённяшняй сустрэчы са студэнтамі і выкладчыкамі яна звярнула ўвагу: на сходзе абмяркоўвалі шырокі спектр тэм, якія тычацца маладзёжнай палітыкі. “Мяне вельмі цікавіла пытанне прадастаўлення першага рабочага месца маладым спецыялістам. Як было адзначана, сістэма размеркавання, якая існуе ў Беларусі, будзе захаваная. Гэта вельмі важна”, – лічыць студэнтка.
Паводле яе слоў, сёння з боку дзяржавы маладым людзям аказваецца ўсебаковая падтрымка. “Наша ж задача – працаваць, развівацца, раскрываць свае таленты, выяўляць сябе. Усё ў нашых руках”, – дадала Дар’я Казлова.
На дыялогавай пляцоўцы ў ВНУ гаворка ішла і аб патрыятычным выхаванні моладзі, ролі ў гэтым працэсе грамадскіх арганізацый. Удзельнікі дыскусіі сышліся ў меркаванні, што арганізацыям варта больш рабіць сумесных маштабных праектаў, шырока, у тым ліку і ў медыяпрасторы, сацыяльных сетках, мэсэнджарах, распавядаць пра сваю працу, ініцыятывы.
Прарэктар па выхаваўчай рабоце ўніверсітэта Юрый Нікіцюк нагадаў, што 2021-ы аб’яўлены ў Беларусі Годам народнага адзінства. “Вельмі важна пераадолець усе перыпетыі і захаваць адзінства нацыі, якая можа паспяхова вырашаць задачы на шляху свайго развіцця, паступальнага руху наперад”, – сказаў на заканчэнне ён.
Чытаць артыкул на сайце БЕЛТА:
