У першых чыслах сакавіка на геолага-геаграфічным факультэце ўстановы адукацыі “Гомельскі дзяржаўны ўніверсітэт імя Францыска Скарыны” адбылося папярэдняе размеркаванне выпускнікоў спецыяльнасці “Геалогія і разведка радовішчаў карысных выкапняў” (спецыялізацыі “Геафізічныя метады пошукаў і разведкі”, “Інжынерная геалогія і гідрагеалогія”). Спецыялісты-геолагі сёлета патрабуюцца ў 14 арганізацыях, якія даслалі заяўкі на 25 чалавек.
Асноўнымі заказчыкамі кадраў выступілі РУП “Навукова-вытворчы цэнтр па геалогіі” (філіял “Беларуская комплексная геолагаразведачная экспедыцыя”, філіял “Інстытут геалогіі”, філіял “Мазырская нафтавыведкавая экспедыцыя глыбокага бурэння”) і ўнітарнае прадпрыемства “Геасэрвіс”. Акрамя таго, паступілі заяўкі на інжынераў-геолагаў з праектнага навукова-даследчага рэспубліканскага ўнітарнага прадпрыемства “НДІ Белгіпратапгаз”, ААТ “Белгархімпрам”, ААТ “Брэстпраект”, АУПП “Інстытут Гроднаграмадзянпраект”, камунальнага тапографа-геадэзічнага ўнітарнага прадпрыемства “Гомельгеадэзцэнтр” і іншых арганізацый Рэспублікі Беларусь.
Сферамі прафесійнай дзейнасці выпускнікоў з’яўляюцца прадастаўленне паслуг у горназдабыўной прамысловасці, навуковыя даследаванні і распрацоўкі, геалагічнае вывучэнне нетраў, інжынерныя пошукі пры праектаванні і будаўніцтве будынкаў і збудаванняў, сістэм водазабеспячэння і водаадвядзення, маніторынг і ахова падземных вод, маніторынг і ахова нетраў.
Выпуск геолагаў у гэтым годзе на 1 ступені склаў 11 студэнтаў-бюджэтнікаў і 9 студэнтаў, якія навучаліся на кантрактнай аснове; на 2 ступені (магістратура) – 2 выпускнікі-бюджэтніка. Такім чынам, на аднаго выпускніка-бюджэтніка прыходзіцца 2,3 заяўкі, што кажа пра высокую бягучую патрэбнасць краіны ў дадзеных спецыялістах.
