Чуньцзэ – пачатак новага года па традыцыйным кітайскім месяцовым календары – перакладаецца як Свята вясны, гэта найважнейшая ўрачыстасць сямейнага ўз’яднання. Кожны жыхар Паднябеснай напярэдадні Новага года імкнецца патрапіць у родны дом, каб сустрэцца за сямейным сталом з блізкімі.
Чэнь Лань: на поўначы Кітая вялікую ўвагу надаюць святочнаму сталу, у меню абавязкова ўваходзяць восем страў, якія сімвалізуюць багацце і дабрабыт. Фота аўтара
У Кітаі ў кожнай правінцыі існуюць свае традыцыі святкавання гэтай падзеі. Пра тое, як праходзіць Чуньцзэ на поўначы КНР, расказала студэнтка філалагічнага факультэта ГДУ імя Ф. Скарыны, ураджэнка Кітая Чэнь Лань:
– Людзі ў нашай краіне вельмі дрыгатліва ставяцца да гэтай урачыстасці і заўсёды адзначаюць яе з вялікім размахам. Гэта адно з самых працяглых святаў у Азіі. Вялікая ўвага надаецца вячэры: у меню абавязкова ўваходзяць восем асноўных страў, шырока вядомых як “восем талерак”, сярод іх свініна, бараніна, курыца, рыба і капуста. Такі выбар страў і іх колькасць не выпадковыя: лік 8 і некаторыя прадукты сімвалізуюць багацце і дабрабыт.
Студэнтка адзначыла, што ў яе сям’і на святочным стале заўсёды прысутнічаюць смажаныя аладкі з жоўтага рысу, так як жоўты колер асацыюецца з золатам. Акрамя таго, гэта своеасаблівае пажаданне ўдачы ва ўсіх пачынаннях. Напярэдадні свята кітайцы ўпрыгожваюць дамы ліхтарамі, гірляндамі і палотнамі з пажаданнямі. Амаль усе яны чырвонага колеру, які прыцягвае шчасце, дастатак і абараняе ад цёмных сіл. На свята прынята дарыць чырвоныя канверты з грашыма, а таксама прысмакі і цацкі. Апоўначы запускаюць петарды і феерверкі, каб павітаць бога багацця.
Па словах Чэнь Лань, у гэтым годзе яна не зможа правесці свята з сям’ёй, будзе сустракаць Новы год з землякамі ў Беларусі. Прыгатуе пельмені, традыцыйныя “восем талерак” і абавязкова паглядзіць віншаванне ад старшыні КНР Сі Цзіньпіна.
