10 верасня 2025 г. ва ўніверсітэце ўпершыню адбыўся квіз «1939 год у лёсе беларускага народа: аднаўленне гістарычнай справядлівасці», падрыхтаваны кафедрай гісторыі Беларусі. У ім бралі ўдзел студэнты з усіх факультэтаў. На ўрачыстым адкрыцці прагучалі словы прарэктара па бяспецы, рэжыме і кадрах А. М. Куксо і дэкана факультэта гісторыі і міжкультурных камунікацый С. А. Чаропка, якія акцэнтавалі ўвагу прысутных на значнасці гістарычнай падзеі 17 верасня 1939 года для Беларусі.
Конкурсная праграма прадугледжвала выкананне заданняў у трох турах. Змест заданняў на першым этапе спаборніцтва быў арыентаваны на выяўленне агульных прадстаўленняў па айчыннай гісторыі, на другім патрабавалася прадэманстраваць свае веды ў галіне ваеннай тэхнікі і зброі тых далёкіх часоў, апошняя частка квіза паказала узровень падрыхтаванасці студэнцкай моладзі ў сферы культурных здабыткаў Беларусі, звязаных з лёсам беларускага народа напярэдадні і ў час уз’яднання ў адзінай дзяржаве.
11 каманд у складзе да 7 чалавек адказвалі на пытанні, фармуліроўкі многіх з іх суправаджаліся дакументальнымі фотаздымкамі, ілюстрацыйным радам баявой тэхнікі, партрэтамі вядомых ваенных і палітычных дзеячаў, выявамі знакавых для Заходняй Беларусі аб’ектаў культурнай спадчыны. У рэшце журы конкурса прыняла наступнае рашэнне. Лідэрам конкурса была прызнана каманда факультэта гісторыі і міжкультурных камунікацый, ёй прысуджана 1 месца.
Таксама надзвычай добрыя веды прадэманстравала каманда геолага-геаграфічнага факультэта, якая разам з камандамі факультэта фізічнай культуры і факультэта фізікі і інфармацыйных тэхналогій заняла пачэснае 2 месца.
3 месца падзялілі паміж сабой студэнты філалагічнага факультэта, факультэта замежных моў і факультэта матэматыкі і тэхналогій праграміравання. Гэтыя каманды атрымаюць дыпломы адпаведна 1, 2 і 3 ступені. Журы аб’яўляе падзяку камандам эканамічнага, юрыдычнага, біялагічнага факультэтаў і факультэта псіхалогіі і педагогікі. Сертыфікаты аб удзеле ў конкурсе будуць выдадзены кожнаму з 64 удзельнікаў.
Вялікі дзякуй таксама ўсім намеснікам дэканаў па ідэалагічнай і выхаваўчай рабоце, якія садзейнічалі арганізацыі квіза.
